ახალი ამბები

ბრიტანეთის პრემიერ-მინისტრის მუქარის მიუხედავად, რუსული „ჩრდილოვანი ფლოტის“ ხომალდები გაერთიანებული სამეფოს წყლებში შეუფერხებლად შედიან.

ამის შესახებ ვრცელ მასალას "ბიბისი" აქვეყნებს.

რატომ არის მნიშვნელოვანი: თითქმის შვიდი კვირის წინ კირ სტარმერმა განაცხადა, რომ ბრიტანეთის შეიარაღებულ ძალებს სანქცირებულ გემებზე აყვანის უფლება მიეცათ, რათა „ჩაეხშოთ რუსეთის ომის მანქანის დაფინანსება“. თუმცა, რეალობა სხვანაირი აღმოჩნდა.

ციფრებში: BBC Verify-ის ანალიზის მიხედვით, მუქარის შემდეგ ბრიტანეთის წყლებში სანქცირებულმა გემებმა 238 რეისი შეასრულეს (სულ დაფიქსირდა 184 სხვადასხვა ხომალდი). მთავრობას არცერთ მათგანზე სამხედროების აყვანის მტკიცებულება არ წარუდგენია.

სტრიქონებს შორის: ექსპერტები და სამხედროები მომხდარს სხვადასხვანაირად აფასებენ:

• „სავალალო უმოქმედობა“: სამეფო სამხედრო-საზღვაო ფლოტის ყოფილმა მეთაურმა, ტომ შარპმა ბრიტანეთის ქმედებებს „გაურკვეველი“ და „სავალალო“ უწოდა და აღნიშნა, რომ ქვეყანა რისკებს ერიდება.

• სამხედრო ესკორტი: ერთ-ერთ სანქცირებულ რუსულ ტანკერს ბრიტანეთის წყლების გავლისას თან სდევდა რუსული სამხედრო ფრეგატი „ადმირალი გრიგოროვიჩი“.

• კრემლის რეაქცია: მოსკოვმა ბრიტანეთის მუქარას „ღრმად მტრული ნაბიჯი“ უწოდა და განაცხადა, რომ ამას „შედეგები მოჰყვება“.

რეალური ბარიერი: საზღვაო სამართლის იურისტების განმარტებით, ლონდონს, შესაძლოა, ხელ-ფეხს საერთაშორისო სამართალი უკრავდეს. სხვა ქვეყნის დროშის ქვეშ მცურავი გემის დაკავება (თუნდაც ის სანქცირებული იყოს) საერთაშორისო წყლებში თითქმის შეუძლებელია, თუ ის დროშას არ მალავს.

ეფექტი მაინც არსებობს: მიუხედავად იმისა, რომ გემებს არ აკავებენ, ბრიტანეთის პოლიტიკამ ზოგიერთ მათგანს (მაგალითად, ჩინურ ტანკერ Yi Tong-ს) მარშრუტი შეაცვლევინა. მათ უფრო გრძელი და ძვირადღირებული გზის არჩევა მოუწიათ ირლანდიის გარშემო, რაც რუსული ნავთობის ტრანსპორტირებას აძვირებს.

რას ამბობს მთავრობა: ბრიტანეთის თავდაცვის სამინისტრო პირდაპირ არ პასუხობს კითხვას, აიყვანეს თუ არა რომელიმე გემზე სამხედროები. უწყება აცხადებს, რომ ისინი „აშფოთებენ და აფერხებენ“ ჩრდილოვან ფლოტს და 2024 წლის ოქტომბრის შემდეგ 700-ზე მეტ საეჭვო გემს გამოუცხადეს პროტესტი/გაფრთხილება.

კონტექსტი: რუსეთი იყენებს ნავთობის ტანკერების „ჩრდილოვან ფლოტს“ გაუმჭვირვალე მფლობელობის სტრუქტურებით, რათა გვერდი აუაროს მის ნავთობპროდუქტებზე დაწესებულ საერთაშორისო სანქციებს.