ახალი ამბები

არასრული იანვრის განმავლობაში რუსეთის საოკუპაციო არმიის წინსვლის ტემპი უკრაინაში მკვეთრად შემცირდა და გასული 1 წლის განმავლობაში მინიმალურ მაჩვენებელს გაუტოლდა. 

ვითარების არსი: ამის შესახებ უკრაინის გენერალურ შტაბთან დაკავშირებული OSINT პროექტის, Deep State-ის მონაცემების ანალიზი მეტყველებს. 

• მიმდინარე თვის განმავლობაში რუსეთის არმიამ სულ 152 კვადრატული კილომეტრი ტერიტორია დაიკავა, რაც სამჯერ უფრო ნაკლებია 2025 წლის დეკემბრის მაჩვენებელზე. 
  
  
• ამასთანავე, გასული კვირის განმავლობაში წინსვლის ტემპი 2025 წლის მარტის შემდეგ მინიმალურ დონეზეა. 

ჩაშლილად: იანვრის განმავლობაში ყველაზე აქტიურად საოკუპაციო არმია დონეცკის ოლქის ჩრდილოეთში ქალაქ სლოვიანსკა და კონსტანტინივკას რაიონში მიიწევდა - ამ მონაკვეთზე მათ სულ 60 კვადრატული კილომეტრი ტერიტორია დაიკავეს. 

• 38 კვადრატული კილომეტრი დაიკავა საოკუპაციო არმიამ ქალაქ პოკროვსკის რაიონში და დაახლოებით ამდენივე დონეცკის სამხრეთ ნაწილში, ზაპორიჟიის ოლქის საზღვრის მიდამოებში. 
  
  
• იანვრის მაჩვენებელი (152 კვ/კმ²) საგრძნობლად ჩამოუვარდა გასული თვეების მაჩვენებელს: დეკემბერი - 423 კვ/კმ²; ნოემბერი - 489 კვ/კმ². 
  

სტრიქონებს შორის: საოკუპაციო არმიის წინსვლის შენელების ტენდენცია სამხედრო ექსპერტების შეფასებით დეკემბრის მეორე ნახევრიდან დაიწყო და ამის მიზეზად გაუარესებული ამინდი, შემცირებული დღე და მწვანე საფარის არარსებობა სახელდება. 

• ექსპერტების შეფასებით, ამ გარემოში გაცილებით რთულდება ქვეითი დანაყოფების მოძრაობა და შეზღუდულია მობილობა, ხოლო ბრძოლის ველი უფრო გამჭვირვალეა. 
  
  
• პრაქტიკულად შეჩერებულია რუსული არმიის წინსვლა ზაპორიჟიის ოლქში, ქალაქ ჰულაიპოლეს მიმართულებით, რომელსაც ოკუპანტები მთელი დეკემბრის განმავლობაში აქტიურად უტევდნენ. 

დიდი სურათი: საოკუპაციო არმიის წინსვლის შეჩერება აბუ-დაბიში დაწყებული სამმხრივი მოლაპარაკებების ფონზე მიმდინარეობს - გასულ თვეებში ბრძოლის ველზე წინსვლის მზარდ ტემპს რუსეთის აშშ-სთან მოლაპარაკებებში კოზირად იყენებდა და დონეცკის ოლქიდან უკრაინული ჯარების გაყვანას ითხოვდა. 

• რუსეთში დონალდ ტრამპის სპეციალური წარმომადგენლის, სტივ უიტკოფის ბოლო ვიზიტის შემდეგ საგარეო საკითხებში ვლადიმირ პუტინის მრჩეველმა, იური უშაკოვმა კიდევ ერთხელ განაცხადა, რომ რუსეთი გააგრძელებს დასახული ამოცანების შესრულებას ბრძოლის ველზე. 

კონტექსტი: 2025 წლის შემოდგომაზე, როდესაც რუსეთის არმია წინსვლის მზარდ ტემპებს აჩვენებდა, სამხედრო კომუფლაჟში გამოწყობილი ვლადიმირ პუტინი დროის მოკლე მონაკვეთში რამდენიმეჯერ ესტუმრა სხვადასხვა სამეთაურო პუნქტს ე.წ. სპეციალური სამხედრო ოპერაციის ზონაში. 

• გენერლები რუსეთის პრეზიდენტს რეალური და გამოგონილი წარმატების შესახებ უყვებოდნენ, თუმცა თავად პუტინი და პროპაგანდა ცდილობდა გარდაუვლად წარმოეჩინა უკრაინული დანაყოფების მარცხი დონბასში.