ახალი ამბები

რუსეთს არ აქვს საკმარისი საბრძოლო მასალა და ჯარი უკრაინაში ფართომასშტაბიანი შეტევის დასაწყებად და ამისათვის მას სხვა ქვეყნებიდან საბრძოლო მასალის მნიშვნელოვანი მარაგების უზრუნველყოფა დასჭირდება.

ამის შესახებ ნატოს მაღალჩინოსანმა 9 ივლისს განაცხადა.

ნატოს ყოველწლიური სამიტის გახსნამდე, ოფიციალურმა წარმომადგენელმა ჟურნალისტებს განუცხადა, რომ რუსეთს ძალიან დიდი ზარალი აქვს ბრძოლის ველზე, რადგან მცირე ტერიტორიული მიღწევების კონსოლიდაციისთვის იბრძვის და არ გააჩნია საკმარისი ჯარი და საბრძოლო მასალა ფართომასშტაბიანი შეტევის განსახორციელებლად.

მისი თქმით, რუსი ოკუპანტები იძულებული არიან არარეალისტური მიზნების მისაღწევად დაუკომპლექტებული და გამოუცდელი ნაწილები გაგზავნონ.

ნატოს ოფიციალური პირები ამბობენ, რომ შეტევითი დინამიკის შესანარჩუნებლად, რუსეთს მოუწევს საბრძოლო მასალის მნიშვნელოვანი მარაგის უზრუნველყოფა სხვა ქვეყნებიდან და არა მხოლოდ ირანიდან და ჩრდილოეთ კორეიდან. გარდა ამისა, რუსეთის პრეზიდენტმა ვლადიმერ პუტინმა ახალი ფართომასშტაბიანი მობილიზაციის ბრძანება უნდა გასცეს.

თებერვლის მდგომარეობით, როგორც უკრაინის პრეზიდენტი ვოლოდიმირ ზელენსკი აცხადებს, რუსი ოკუპანტები უკრაინის ტერიტორიის დაახლოებით 26%-ს აკონტროლებენ.

2024 წლის 10 მაისის, დილით, რუსეთმა ახალი შეტევა დაიწყო ხარკივის რეგიონის ჩრდილოეთით. ზელენსკის თქმით, ამ შეტევის დროს მსხვერპლის კოეფიციენტი არის რვა რუსი ერთი უკრაინელის მიმართ.

26 მაისს უკრაინის პრეზიდენტმა განაცხადა, რომ რუსეთის ფედერაცია აგროვებს ჯარების კიდევ ერთ ჯგუფს საზღვართან ახალი შეტევისთვის.