ახალი ამბები

16 ოქტომბერს გამართულ სატელეფონო საუბარში ვლადიმირ პუტინმა ომის დასრულების სანაცვლოდ დონეცკის ოლქიდან უკრაინული არმიის გასვლა მოითხოვა, სანაცვლოდ კი ნაწილობრივ ოკუპირებული ხერსონისა და ზაპორიჟიის ოლქის ნაწილი შესთავაზა. 

ვითარების არსი: ინფორმაციას ამის შესახებ Washington Post საკუთარ წყაროებზე დაყრდნობით ავრცელებს. 

• გაზეთის წყაროებით ბოლო სატელეფონო საუბარში პუტინის მიერ გაჟღერებული მოთხოვნები ოდნავ ნაკლებად ამბიციურია, ვიდრე მის მიერ ალასკაში გამართულ შეხვედრაზე, როდესაც რუსეთის პრეზიდენტმა ნაწილობრივ ოკუპირებული ოთხივე ოლქიდან მოითხოვა უკრაინული არმიის გაყვანა. 
  
  
• ზაპორიჟიისა და ხერსონის ოლქში გარკვეული ტერიტორიების დათმობის მზაობა ტრამპის ადმინისტრაციის ზოგიერთმა წევრმა პროგრესად აღიქვა, თუმცა მათთვისაც გასაგებია, რომ უკრაინელები აღნიშნულ წინადადებას არ დათანხმდებიან. 
  
  

ჩაშლილად: გაზეთის წყაროების ცნობით, 17 ოქტომბერს თეთრ სახლში გამართულ შეხვედრაზე უკრაინულ დელეგაციას დონეცკის დათმობისკენ მოუწოდებდა ტრამპის სპეციალური წარმომადგენელი სტივ უიტკოფი. 

• სწორედ უიტკოფი იყო ალასკაში გამართული სამიტის შუამავალი - უკრაინულ დელეგაციასთან შეხვედრაზე უიტკოფი ამახვილებდა ყურადღებას, რომ დონეცკის მოსახლეობა რუსულენოვანია. 

დიდი სურათი: ამასთანავე რამდენადაც საჯარო განცხადებებით შეგვიძლია ვიმსჯელოთ ტრამპი ჯერჯერობით არ იზიარებს პუტინის მოთხოვნას - ზელენსკისთან შეხვედრის შემდეგ გამოქვეყნებულ პოსტში ამერიკელი პრეზიდენტი წერდა, რომ კონფლიქტი ფრონტის არსებულ ხაზებზე უნდა გაიყინოს. 

• ფრონტის არსებულ მდგომარეობაში გაყინვას და დაუყოვნებლივ ზავს მხარს უჭერს უკრაინაც. 

კონტექსტი: გაზეთის წყაროების ცნობით, ტერიტორიული საკითხები ვლადიმირ პუტინისა და დონალდ ტრამპის მომავალი შეხვედრის ერთ-ერთი მთავარი თემა იქნება. 

• შეხვედრის შესახებ შეთანხმება პუტინისა და ტრამპის რიგით მერვე სატელეფონო საუბარში შედგა და ის მომდევნო 2 კვირის განმავლობაში ბუდაპეშტში გაიმართება. 
  
  
• ამერიკის მხრიდან სამიტის მომზადებას სახელმწიფო მდივანი მარკო რუბიო უხელმძღვანელებს, რამაც წყაროების ცნობით, უკრაინული დელეგაცია დაამშვიდა. 
  
  
• უკრაინასა და არაერთ ევროპულ დედაქალაქში მიაჩნიათ, რომ უიტკოფი ვერ ერკვევა ვითარებაში და ვერ გამოაქვს სწორი გზავნილები კრემლთან კომუნიკაციის შემდეგ. 
  
  
• დასავლური მედიის ცნობით, სწორედ უიტკოფის მიერ არასწორად ინტერპრეტირებული პუტინის პოზიციები გახდა ალასკის სამიტის ორგანიზებისა და შემდეგ მისი წარუმატებლობის მიზეზი. 
  
  

სიღრმისეულად: უარი ტომაჰავკებზე და დაძაბული შეხვედრა - როგორ ჩაიარა ზელენსკის ვიზიტმა აშშ-ში