ახალი ამბები

ქალაქ გროზნოს სასამართლომ, ჩეჩნეთის რესპუბლიკა იჩქერია ტერორისტულ ორგანიზაციად ცნო.

არსებული ვითარება: ორგანიზაციის ხელმძღვანელად რუსეთის საზღვრებს გარეთ მყოფი აჰმედ ზაქაევი სახელდება, რომელიც არაღიარებული რესპუბლიკის მთავრობის თავმჯდომარეა. 

• რუსეთის ფედერალური უსაფრთხოების სამსახურის (ФСБ) განცხადების თანახმად, 1991 წელს შექმნილი ორგანიზაცია დღეს 29 ქვედანაყოფისგან შედგება, რომლებიც ევროპის 14 ქვეყანაშია განთავსებული.
  
  
• უკრაინაში სრულმასშტაბიანი ომის დაწყების შემდეგ, ჩეჩნეთის იჩქერიის რესპუბლიკის მომხრეების ნაწილი რუსეთის წინააღმდეგ საბრძოლო მოქმედებებში ჩაერთო.
  
  
• ФСБ-ს მტკიცებით, ორგანიზაციის მებრძოლები ყირიმსა და ბელგოროდის ოლქში მომხდარ რამდენიმე დივერსიაში იღებდნენ მონაწილეობას.
  
  
• ორგანიზაციის საქმიანობა რუსეთში აკრძალულია, მის წევრებს კი სამუდამო პატიმრობა ემუქრებათ.

ჩაშლილად: 2022 წელს, უკრაინაში ომის დაწყების შემდეგ, ჩეჩნეთის ლიდერმა რამზან კადიროვმა ზაქაევის მკვლელობისთვის ფულადი ჯილდო დააწესა.

• დღეის მდგომარეობით, უკრაინის შეიარაღებული ძალების რიგებში ჩეჩნეთის იჩქერიის რესპუბლიკის მომხრე რამდენიმე შენაერთი იბრძვის.
  
  
• ეს არის უცხოური ლეგიონის შემადგენლობაში შემავალი სპეციალური დანიშნულების ბატალიონი (ОБОН), რომელიც ზაქაევის ინიციატივით შეიქმნა. 
  
  
• მათ რიცხვშია შეიხ მანსურისა და ჯოხარ დუდაევის სახელობის ბატალიონები, ქვედანაყოფი "ცოფიანი ხროვა", სპეციალური ოპერაციების ჯგუფი (SOG) და ჰამზატ გელაევის სახელობის ბატალიონი.

წინარე ისტორია: ჩეჩნეთის რესპუბლიკა იჩქერიამ დამოუკიდებლობა 1991 წელს გამოაცხადა. თვითგამოცხადებული რესპუბლიკის პირველი პრეზიდენტი ჯოხარ დუდაევი გახდა.

• 1994 წელს რუსეთმა ამ ტერიტორიაზე ჯარი შეიყვანა. ორწლიანი ომის შემდეგ ხელი მოეწერა ჰასავიურთის შეთანხმებას, რის შედეგადაც რუსულმა ჯარმა იჩქერია დატოვა. თუმცა, 1999 წელს საომარი მოქმედებები განახლდა, როდესაც რუსეთმა ე.წ. ანტიტერორისტული ოპერაცია დაიწყო.
  
  
• ჩეჩნეთის მეორე ომი 2009 წლამდე გაგრძელდა და რუსეთის გამარჯვებით დასრულდა. მოსკოვმა რეგიონზე კონტროლი აღადგინა, ჩეჩნეთის რესპუბლიკა იჩქერია გააუქმა და იქ მარიონეტული რეჟიმი დაამყარა. 
  
  
• აჰმედ ზაქაევმა ჩეჩნეთი 2000 წელს დატოვა. 2002 წელს იგი კოპენჰაგენში რუსეთის მოთხოვნით დააკავეს, თუმცა დანიის სასამართლომ ექსტრადიციაზე უარი განაცხადა და იგი გაათავისუფლა. მას შემდეგ ზაქაევი რუსეთის მუდმივი მუქარისა და ზეწოლის ობიექტია.